CENSO DA INDUSTRIA DE TRANSFORMACIÓN DA MADEIRA EN GALICIA
Ver PDF descritivo do Proxecto [70 KB]
Durante os anos 1998-2000, o CIS-Madeira realizou o primeiro censo da industria transformadora da madeira de Galicia, co obxectivo de dispor dunha base de datos que permita coñecer a situación da cadea de transformación da madeira e orientar as accións futuras encamiñadas a acadar unha maior competitividade das empresas do sector.
O censo está composto por uns 3000 rexistros de empresas e empresarios autónomos, proporcionando coa súa análise unha visión global da cadea de transformación da madeira de Galicia, permitindo o desenvolvemento de proxectos como o da constitución do Clúster da Madeira de Galicia ou o Plan Estratéxico das Actividades de Carpintería e Mobiliario de Galicia.
O balanzo da industria da madeira de Galicia para o ano 2000, que se resume no PDF adxunto, realizouse sobre a base da información dispoñible en dito censo.
As cortas anuais de madeira en Galicia para usos industriais, supón un volume aproximado de 6,5 MM de m3 c.c. (con cortiza) dos cales 5,9 transfórmanse na nosa Comunidade Autónoma. Adicionalmente, no ano 2000, Galicia importou 0,5 MM de m3 c.c. para cubrir as necesidades da industria da primeira transformación (sen incluír madeira de frondosas) e exportou a outras Comunidades cerca de 1,1 MM de m3 c.c. sen elaborar (basicamente eucalipto para a produción de pasta de papel).
A industria do serrado consume o 46,5% da materia prima, o subsector de taboleiros e chapas o 36,5% e o 17% restante é empregado na fabricación de pasta de celulosa.
En canto as principais especies empregadas pola industria galega, o 61% da madeira transformada é de Pinus sp, o 31% de Eucalyptus globulus e o 8% doutras frondosas.
A industria do serrado está formada por unhas 470 instalacións, que producen anualmente 1,2 MM de m3 de madeira serrada, principalmente coníferas (82%), xerando un volume de subprodutos de 0,95 MM de m3 que é reciclado pola industria de taboleiros derivados da madeira.
O subsector de taboleiros e chapas está constituído por 25 plantas industriais que producen anualmente 1,8 MM de m3 de taboleiros, principalmente taboleiro de partículas (53%) e taboleiro de fibras de media densidade (30%).
Ademais, en Galicia prodúcense, nunha única planta, 335.000 toneladas de pasta de celulosa do tipo TCF (Totally Chlorine Free) a partires de madeira de eucalipto.
As segundas transformacións están formadas por unhas 2400 empresas e empresarios autónomos (1.360 de carpintería e 1.046 de mobiliario).
O conxunto do sector forestal de Galicia factura anualmente 1.562 millóns de euros, dos que 1.328 millóns proceden da industria de transformación da madeira.
O subsector do serrado ten un volume de negocio de 180 millóns de euros, a fabricación de taboleiros e chapa 512 millóns, a fabricación de pasta de celulosa 216 millóns e a industria de carpintería e mobiliario 421 millóns de euros.
Doutra banda, as 3.016 empresas da industria de transformación da madeira proporcionan 17.000 empregos director concentrados nas actividades de carpintería e mobiliario (10.000 empregos).
Centro de Innovación e Servizos da Madeira
Censo da industria
Última modificación o 06/09/2011 ás 13:45.
